யுத்தம் செய்யும் கண்கள் ! கவிஞர் இரா .இரவி !

யுத்தம்  செய்யும்  கண்கள்  ! கவிஞர்  இரா  .இரவி  !

இமைக்காமல் பார்க்கும் போட்டியில் 
என்னவளிடம் தோற்றுவிட்டேன் நான் !

காந்தம் இரும்பைக் கவர்ந்து இழுக்கும்
கள்ளியின் கண்கள் என்னைக் கவரும் !

கண்ணும் கண்ணும் நோக்கும்போது
காளையின்  உடலில் வேதியல் மாற்றங்கள் !

அண்ணலும் நோக்கினான் அவளும் நோக்கினாள்
அழமாகப் பதிந்தது அழகிய வரிகள் !

பார்வை உள்ளவர்களின் காதல் முன்னுரை
பார்வையால்தான் எழுதி வருகின்றனர் !

முதல் பார்வையிலேயே காதல் வருவதுண்டு
முன்மொழிந்து வழிமொழிந்து நிகழ்வதுண்டு !

கண்கள் செய்யும் யுத்தத்தில் பெரும்பாலும்
கன்னிகள் வெல்கின்றனர் காளைகள் தோற்கின்றனர் !

கண்கள் பேசும் இனிய நேரங்களில்
காதலர்களுக்கு இதழ்கள் மவுனமாகின்றன !

விழிகளின் மொழி காதலர்கள் மட்டும் அறிவர்
விழுந்தவர்கள் ஆழ்ந்தவர்களுக்குப்  புரியும் !

பரதநாட்டியக் கலைஞர்களும் தோற்கும் வண்ணம்
பாவை அவளின் விழிகள் பரதம் ஆடும் !

அன்பாகவும் பார்ப்பாள் அடித்தும் பார்ப்பாள்
அளவின்றிப் பார்ப்பாள் அப்படியே விழுங்குவாள் !

விழியால் பசியாறி பசியினை மறப்பாள்
விடிந்ததும் பாரத்தால் மகிழ்ச்சிப் பிறக்கும் !

ஆயிரம் பேரில் அவள் அமர்ந்திருந்தாலும்
அவளது விழிகள் காட்டிக் கொடுக்கும் !

புவி ஈர்ப்பு விசை எல்லோருக்கும் பொது
பாவையின் விழி ஈர்ப்பு விசை எனக்கு மட்டும் !

விஞ்ஞானிகளுக்கு வேண்டுகோள் வைக்கிறேன்
விழிகளில் மின்சாரம் உள்ளது கண்டுபிடியுங்கள் !

யுத்தம் செய்யும் கண்கள் என்னவளுக்கு
யுகம் முடியும் வரை  காயம் செய்து இதம் தரும் !