தினமணி கவிதைமணி தந்த தலைப்பு !
தீ தின்ற உயிர்! கவிஞர் இரா. இரவி !
அல்வாவிற்கு பெயர்ப் பெற்ற ஊர் திருநெல்வேலி
அல்லல் அடைந்ததில் பெயர்ப் பெற்றது நெஞ்சுக்கு வலி !
பார்த்தவர்கள் மனதில் பற்றியது தீ
பாவம் குடும்பமே தீயுக்கு இரையானது !
காவல் நிலையத்தில் புகாரளித்து பயனில்லை
கால்கடுக்க நின்று மனுநீதியில் மனுஅளித்தும் பயனில்லை !
அசலுக்கும் அதிகமாக வட்டி கட்டிய போதும்
அடியாளாக வந்து காவலரே மிரட்டிய போதும் !
வாழ்க்கையை வெறுத்து தீக்குளித்து வெந்தனர்
வாழ்வதில் அர்த்தமில்லை எனக் கதையை முடித்தனர் !
சிறு பிஞ்சுக் குழந்தைகளும் தீயில் வெந்து
சிதைந்து கரிக்கட்டையாகித் தரையில் விழுந்தனர் !
எந்தத் தீங்கும் செய்யாத குழந்தைகளுக்கும்
வெந்தத் தீயை தந்தது சமுதாயக் கொடுமை !
ஏவுகணைகள் ஏவிய போதும் ஆள்வோரே
ஏழ்மையை இல்லாமல் ஆக்குங்கள் அதுபோதும் !
அடிப்படைத் தேவைகள் பூர்த்தி செய்யுங்கள்
அடாவடி கந்துவட்டி கயவர்களைக் கைது செய்யுங்கள் !
ஏழைகளுக்கு உதவிட வங்கிகளின் சட்டதிட்டங்களை
எளிமையாக்கி மனிதநேயம் பேணுங்கள் !
தீயை அணைக்க முயன்றும் முடியவில்லை
தீயவர்களைத் திருத்த முயன்றும் முடியவில்லை !
கந்துவட்டி தடுப்புச் சட்டம் சட்டமாகவே உள்ளது
கந்துவட்டியை ஒழிக்க சட்டத்தால் இயலவில்லை !
கந்துவட்டிக்காரனுடன் காவல்துறையும் கூட்டு
களங்கம் கற்பித்த காவலருக்குத் தரவேண்டும் வேட்டு !
வட்டிக்கு விடுவதே தீங்கு என்கின்றது நீதிநூல்
வட்டிக்கு வட்டி வாங்கும் கொடுமை தொடர்கின்றது !
மனிதனால் அச்சடிக்கப்பட்ட பணம் இன்று
மனிதனின் உயிரையே வாங்கி விடுகின்றது !
நெஞ்சு பொறுக்கவில்லை கண்டிட்ட காட்சி
நயவஞ்சகர்கள் நயநெஞ்சகர்கள் திருந்திட வேண்டும் !
டயனோசர் விலங்கு உலகில் இல்லை என்கின்றனர்
டயனோசரை விடக் கொடிய கந்துவட்டிக் கும்பலை ஒழியுங்கள் !
தீ தின்ற உயிர் திரும்ப வரப்போவதில்லை ஆனால்
தீ திங்க இனி ஒரு உயிரையும் தராமல் காப்போம்!
கருத்துகள்
கருத்துரையிடுக