இரண்டு மனம் ! கவிஞர் இரா .இரவி !
எல்லோருக்கும் உண்டு இரண்டு மனம்
ஒன்று தேவதை மற்றொன்று சாத்தான் !
தேவதை சொல்வதைக் கேட்டு நடந்தால்
தேவைப்படாது என்றும் அச்சம் பயம் !
சாத்தான் சொல்வதைக் கேட்டு நடந்தால்
சாத்தியப்படாது என்றும் நிம்மதி மகிழ்ச்சி !
நல்லது நினைக்க நல்லதே நடக்கும்
கெட்டது நினைக்க கெட்டதே நடக்கும் !
செய்யாதே என்று தேவதை சொன்னால்
செய்யாமல் இருந்தால் நன்மை கிட்டும் !
செய்திடு என்று சாத்தான் சொன்னால்
செய்யாமல் இருந்தால் நிம்மதி கிட்டும் !
மனம் ஒரு குரங்கு என்றார்கள் அன்று
மனக்குரங்கை அடக்குவது கடமை !
மனம் போன போக்கில் எல்லாம்
மனிதன் போக நினைப்பது மடமை !
மனசாட்சி என்று ஒரு சாட்சி உண்டு
மனதை அதன் வழி செலுத்தல் நன்று !
அறமனம் சொல்வதைக் கேட்டு நடங்கள்
மடமனம் சொல்வதை என்றும் கேட்காதீர்கள் !
கருத்துகள்
கருத்துரையிடுக