நடிகர் திலகம் சிவாஜி - நாட்டியப் பேரொளி பத்மினி: தமிழ் சினிமாவின் அழிக்க முடியாத 'டாப் கெமிஸ்ட்ரி' ஜோடி!
நடிகர் திலகம் சிவாஜி கணேசனின் திரைப்பயணம் ஒரு சகாப்தம் என்றால், அந்த சகாப்தத்தின் பல திருப்புமுனைகளிலும் நாட்டியப் பேரொளி பத்மினிக்கு ஒரு தனித்துவமான இடம் உண்டு.
சிவாஜியின் பல 'முதல்' சாதனைகளில் இணைபிரியாத ஜோடியாக, சில சமயம் துணிச்சலான சக நடிகையாக, பத்மினி திகழ்ந்திருக்கிறார். அந்த அற்புதம் இங்கே விரிகிறது.
பல 'முதல்'களில் இணைந்த பயணம்
சிவாஜியின் முதல் காமெடிப் படமான ‘கல்யாணம் பண்ணியும் பிரம்மச்சாரி’யில் அவருக்கு ஜோடி பத்மினிதான். இதேபோல், சிவாஜியின் முதல் பட விநியோக முயற்சிக்குக் காரணமாக அமைந்த ‘அமரதீபம்’ படத்திலும் அவர்தான் நாயகி. சிவாஜியின் முதல் புராணப் படமான ‘சம்பூர்ண இராமாயணம்’ மற்றும் முதல் இரட்டை வேடப் படமான ‘உத்தமபுத்திரன்’ ஆகியவற்றிலும் பத்மினியின் பங்கு தவிர்க்க முடியாதது.
தமிழில் முதல் சரித்திரப் படம் மற்றும் சிவாஜியின் முதல் வண்ணப்படம் என்ற பெருமைகளைக் கொண்ட ‘வீரபாண்டிய கட்டபொம்மன்’னிலும் அவர் நடித்தார். அதுமட்டுமல்ல, ஆசிய அளவில் முதல் அயல்நாட்டு விருதை அந்தப் படம் பெற்றபோது, சிவாஜியுடன் அயல்நாட்டுக்குச் சென்ற பெருமையும் பத்மினிக்குக் கிடைத்தது. சிவாஜி புரொடக்ஷன்ஸ் தயாரித்த முதல் படமான ‘வியட்நாம் வீடு’ படத்திலும் இந்த டாப் கெமிஸ்ட்ரி ஜோடி மீண்டும் இணைந்தது.
இப்படி, சிவாஜியின் பல மைல்கற்கள் சம்பந்தப்பட்ட விஷயங்களில் பத்மினிக்கும் அதிகப் பங்கு உண்டு. அதனால்தான், அந்தக் காலத்தில் ஒரு நடிகருக்குப் பொருத்தமான ஜோடி என்றால், அது சிவாஜி-பத்மினிதான்; அந்தக் காலத்து ‘கெமிஸ்ட்ரி’க்கு இவர்கள்தான் முதல் உதாரணம்.
பாசப்பிணைப்பு: 'கணேஷ்'ஷும் 'பப்பி'யும்
திரைக்கதைக்கு அப்பாலும் இவர்கள் மத்தியில் இருந்த பாசப்பிணைப்பு அலாதியானது. ஆரம்ப காலத்தில் பத்மினி, சிவாஜியை 'கணேஷ்' என்று உரிமையுடன் அழைப்பார். சிவாஜியோ பத்மினியை எப்போதும் 'பப்பி' என்றும், உற்சாகமாக இருக்கும்போது செல்லமாக 'பேப்' என்றும் கூப்பிடுவாராம்.
'சம்பூர்ண இராமாயணம்' படப்பிடிப்புக்காக ஓகேனக்கல் போயிருந்தபோது, ஷூட்டிங் முடிந்ததும் மற்றவர்கள் ஓய்வெடுக்கப் போக, சிவாஜி மட்டும் துப்பாக்கியுடன் வேட்டைக்குப் புறப்படுவார். ஒரு நாள் நள்ளிரவு வரை வேட்டையாடி ஒரு முயலைப் பிடித்து, அதை அப்போதே பத்மினியிடம் கொண்டு வந்து கொடுத்தார் சிவாஜி. இந்தச் சிறு சம்பவம் அவர் தன் சக நடிகை மீது வைத்திருந்த பிரியத்தைக் காட்டுகிறது.
நடிப்பில் பரஸ்பரப் பாராட்டு
'தங்கப்பதுமை' (1959) படப்பிடிப்பில் நடந்த ஒரு சம்பவம் இவர்களின் நடிப்பு ஆழத்தை உணர்த்துகிறது. ‘ஈடற்ற பத்தினியின் இன்பத்தைக் கொன்றவன் நான்...’ என்ற பாடலின் நடுவே சிவாஜியின் கண் பறிக்கப்படும் காட்சியில், ஜோடியாக நடித்த பத்மினி ஒரு ஆக்ரோஷமான சத்தம் எழுப்ப வேண்டும். அதுவரை சாதாரணமாக நடித்துக்கொண்டிருந்தவர், அந்தக் காட்சி வந்தபோது ‘வீல்’லென அலறியது ஸ்டுடியோவையே அசரடித்ததாம். சிவாஜி உடனே, "ரொம்ப இயல்பா இருக்கு பப்பி, நல்லா இருந்துச்சு" என்று பாராட்ட, பத்மினி நெகிழ்ந்து போனார். "அவரிடமிருந்து லேசில் பாராட்டு வாங்க முடியாது. அவரே பாராட்டிவிட்டால், அதுக்கு மேலே பெரிய பாராட்டு எதுவும் இருக்க முடியாது" என்று பத்மினி கூறியிருக்கிறார். மற்றவர்கள் பாராட்டியபோது, "இதுக்கெல்லாம் காரணம் சிவாஜிதான். அவரிடமிருந்துதான் எப்படி நடிக்கணும்னு நான் கத்துக்கிட்டேன்" என்று தன்னடக்கத்துடன் சொன்னார்.
பத்மினிக்கு நடிப்பு சொல்லிக் கொடுக்கும்போது சிவாஜி, "நான் நாடகத்தில் நடித்துப் பழகியவன். நீ மேடையில் பாவனைகளைக் காட்டப் பேர் வாங்கியவள். உனக்குச் சொல்லிக் கொடுப்பதில் எனக்கு என்ன சிரமம்?" என்று நம்பிக்கையூட்டியிருக்கிறார்.
ஒரே வருடத்தில் ஒரு டஜன் படங்களில் ஒவ்வொரு கதையாக மாறி மாறி நடித்தும்கூட, ஒரு படத்துக்கும் இன்னொரு படத்துக்கும் குழப்பம் இல்லாமல், சிறப்பாக நடிப்பதை கண்டு, "அவர் ஒரு பிறவி நடிகர்" என வியந்துள்ளார் பத்மினி.
கதாபாத்திர எல்லைகளை உடைத்த துணிவு
ஜோடியாகப் பிரகாசித்த காலகட்டத்திலேயே, பத்மினி கதாபாத்திரத்தின் தேவைக்காகத் துணிச்சலான முடிவுகளை எடுத்தார். சிவாஜிக்கு சித்தியாக ‘மங்கையர்திலகம்’ படத்திலும், அண்ணியாக ‘எதிர்பாராதது’ படத்திலும் நடித்தார். இது எந்தக் காலகட்டத்திலும் எந்த முன்னணி நடிகையும் செய்யத் துணியாத விஷயம்.
எல்லாப் படங்களிலும் சிவாஜிக்கு அடங்கி நடிக்கும் பாத்திரத்தில் நடித்த பத்மினி, ‘லட்சுமி வந்தாச்சு’ படத்தில் மட்டும் தன்னுடைய அதிகாரத்தைக் காட்டும் வித்தியாசமான பாத்திரத்தில் நடித்திருப்பார். மேலும், ‘எதிர்பாராதது’ படத்தில் சிவாஜியை நிஜமாகவே அறைந்து நடித்த ஒரே நடிகையும் பத்மினிதான். ‘தீபம்’ மற்றும் ‘ராமன் எத்தனை ராமனடி’ போன்ற படங்களில் ஒரே ஒரு காட்சியில் மட்டும் நடித்துள்ளார்.
'மன்னவன் வந்தானடி' - நாட்டியப் பேரதிசயம்!
பத்மினியின் டான்சுக்கான டாப் லிஸ்ட்டில் ‘தில்லானா மோகனாம்பாள்’ நிச்சயம் இருக்கும். ஆனால், ஒட்டுமொத்த உழைப்பைக் கொட்டியது, ‘திருவருட்செல்வர்’ படத்தில் வரும் ‘மன்னவன் வந்தானடி…’ பாடலுக்குத்தான்.
திரையில் ஏழு நிமிடங்கள் வரும் அந்த நாட்டியக் காட்சிக்காக,
உற்சாகம் இருந்தாலும், ஷூட்டிங்கில் அதன் சிரமம் புரிந்ததாம். இடைவிடாமல் ஆடியதில் தான் அல்லாடிப் போனதாகக் குறிப்பிட்டுள்ளார் பத்மினி. அந்த இனிய கர்நாடக இசை நாதமும், அதற்கேற்பத் தனது ஆடலும், தர்பாரில் நடிகர் திலகம் வந்து நிற்கும் கம்பீரமான தோற்றமும் என்றும் மனதில் நிலைத்திருக்கும் என்றும், அவ்வளவு கஷ்டப்பட்டு ஆடியது வேறு எந்தப் பாட்டுக்கும் இல்லை என்றும் அவர் சொல்லியிருக்கிறார்.
சினிமாவுக்கு அப்பாற்பட்ட நட்பு..
38 வயதில் சினிமாவை விட்டு விலகியிருந்த பத்மினியை, ‘தில்லானா மோகனாம்பாள்’ படத்திற்காக ஏ.பி.நாகராஜன் அணுகியபோது, "மோகனாம்பாள் என்றால் பத்மினி, சிக்கல் சண்முகசுந்தரம் என்றால் சிவாஜி, நீங்கள் இல்லாமல் இந்தப் படத்தை எடுக்க மாட்டேன்" என்று கூறிய பின்னரே அவர் நடிக்கச் சம்மதித்தார்.
1979-ல் பத்மினி நடத்திய நாட்டிய நாடகத்தை, யாருக்கும் சொல்லாமல் கமலா அம்மாவுடன் வந்து பார்த்த சிவாஜி, மேடையேறி ஒரு ஆள் உயர மாலையைத் தானே தூக்கிக் கொண்டு வந்து பத்மினிக்கு அணிவித்தார். அது அவருக்கு ஒரு இன்ப அதிர்ச்சியாக அமைந்தது.
1996-ல் ஒலிம்பிக் பார்க்க அமெரிக்கா சென்றபோது, இதய அறுவை சிகிச்சை செய்து தோற்றம் மாறியிருந்த பத்மினியை விமான நிலையத்தில் பார்த்த சிவாஜிக்கு முதலில் அடையாளம் தெரியவில்லை. பத்மினி என்று தெரிந்ததும் அவர் கண் கலங்கிவிட்டாராம். பத்மினி அமெரிக்காவில் இருந்து தமிழகம் வரும்போதெல்லாம், அன்னை இல்லத்துக்கு வராமல் இருக்க மாட்டார். சிவாஜிக்கு பத்மினியின் பிறந்தநாள் தெரியாவிட்டாலும், சிவாஜியின் பிறந்தநாள், திருமண நாள் என எந்த விசேஷமாக இருந்தாலும் பத்மினி தவறாமல் போனில் வாழ்த்து கூறிவிடுவாராம்.
சிவாஜி - பத்மினி ஜோடியின் முதல் திரைப்படம் ‘பணம்’; கடைசிப் படம் ‘லட்சுமி வந்தாச்சு’. தமிழ் சினிமாவின் ஆரம்ப காலகட்டத்திலேயே, சக கலைஞர்களுக்கு இடையில் இருக்க வேண்டிய தொழில்பக்தி, பரஸ்பரப் பாராட்டு மற்றும் காலம் கடந்து நிற்கும் நட்புக்கு இவர்களது உறவு ஒரு தலைசிறந்த உதாரணம்.
இந்த சுவையான தகவல்களில், சிவாஜி - பத்மினி நடித்த உங்களுக்கு மிகவும் பிடித்த திரைப்படம் எது?
செந்தில்வேல் சிவராஜ்
கருத்துகள்
கருத்துரையிடுக